Herverk framt á bil í Havnini

Ein av fráboðanunum, ið løgreglan hevur fingið seinasta samdøgrið snýr seg um eitt herverk, ið kann vera rótfest í nøkrum persónligum.

Vaktleiðarin á løgreglustøðini sigur við Portalin, at ein heldur serlig fráboðan kom inn í gjárkvøldið frá einum bileigara. Viðkomandi hevði sín bil standandi í Vesturbýnum, og tá hann kom fram á hann var greitt, at tað ikki bar til at fara avstað við bilinum.

Hol var á øllum fýra dekkunum. Umframt hetta var bilurin skøvaður. Hetta sá harvið út sum tilætlað herverk, og eigarin upplýsti fyri løgregluni, at hann heldur seg vita, hvør viðkomandi er.

Talan er helst um onkur persónlig viðurskifti og tilætlað herverk, og vaktleiðarin sigur, at løgreglan seinni í dag fer at kanna málið nærri.