Italia: Bretskur stuttleikabátur sokkin

Ein persónur er deyður, og seks eru saknaðir, eftir at ein stuttleikabátur sakk út fyri italska býin Palermo, eftir at hann varð raktur av einari meldurhvirlu tíðliga í morgun, boða italskir miðlar frá.

22 persónar vóru umborð, harav manningin taldi 10. Tað eydnaðist italskum bjargingarfólkum at bjarga 15 úr sjónum á lívi.

Báturin Bayesian var 56 metrar langur og sigldi undir bretskum flaggi. Meginparturin av fólkunum umborð vóru eisini bretar.

Fyrr í morgun varð boðað frá, at sjey persónar vóru saknaðir - fýra bretar, tveir amerikanarar og ein kanadiari. Ein persónur er síðani funnin deyður.