Tíðindaskriv
Síðani 2017 hevur serstøk játtan verið á fíggjarlógini til nýggjar serlæknar - sokallaða serlæknapuljan. Hetta tíðarskeiðið eru higartil tilsamans settir 10 nýggir serlæknar av hesi játtanini
Í uppskotinum til fíggjarlóg fyri 2023 eru 2,8 milliónir krónur settar av til serlæknapuljuna. Í uppskotinum, sum varð lagt fram í september 2022, var upphæddin 6,3 milliónir Tær fevndu um játtanina fyri 2023 á 2,8 milliónir og játtanina fyri 2022 á 3,5 milliónir.
Í nýggja uppskotinum er hetta roknskapartøkniliga broytt til, at 2,8 milliónir krónur standa á serlæknajáttanini. 3,5 milliónir eru fluttar til vanliga raksturin hjá Landssjúkrahúsinum, til at fíggja serlæknar við tilhoyrandi skrivara og sjúkrarøktarfrøðing, ið vórðu sett í 2022.
Alt í alt er játtanin soleiðis óbroytt í verandi uppskoti í mun til uppskotið frá september 2022. Hetta merkir eisini, at játtan í 2023 er framvegis til tveir serlæknar
Orsøkin til at upphæddin er 2,8 milliónir krónur í ár heldur enn 3,2 milliónir krónur er, at nakað av játtan frammanundan er í rakstrinum hjá Landssjúkrahúsinum til annað serlæknaøkið, sum í dag virkar við eini konsulentskipan, ið partvíst kann sparast, tá serlækni verður settur í starv.
Ætlan fyri serlæknaøkir
Landsstýriskvinnan í heilsumálum fer í næstum undir arbeiði at gera eina ætlan fyri, hvørji serlæknastørv skulu mennast í heilsuverkinum. Greið mál skulu setast fyri, hvussu tørvurin á serlæknum innan sjúkrahúsverkið og kommunulæknaskipanina verður nøktaður.
Serlæknapuljan hevur í fleiri ár verið ein týdningarmikil partur av fíggingini, tá ymisku serlæknaøkini skulu styrkjast ella nýggj skulu setast á stovn.
Tá ið eitt nýtt serlæknastarv verður sett, er útgangsstøði at útreiðslurnar til ein serlækna við heilsustarvsfólkum eru 1,6 mió. kr. Seinastu árini hevur játtanin verið til tað, sum svarar til umleið tvey nýggj serlæknastørv við heilsustarvsfólkum.
Heilsumálaráðið
Vinarliga broyt tínar kennifíla - og privatlívsstillingar fyri at síggja hetta innihald