Ingi Samuelsen
- Nú er nóg mikið.
Soleiðis sigur formaðurin fyri grønlendska landsstýrið, Naalakkersuisut, Jens-Frederik Nielsen eftir at amerikanski forsetin, Donald Trump, var komin við útsøgnini um, at USA hevur brúk fyri Grønlandi.
Landsstýrisformaðurin minnir á, at Grønland í fleiri ættarlið hevur verið ein trúfastur vinur hjá USA, skrivar grønlendska kringvarpið, KNR.
- Júst av hesi orsøk kann retorikkurin frá USA, sum verður endurtikin í hesum tíðum als ikki góðtakast.
- Tá forsetin í USA tosar um, at “okkum tørvar Grønland” og knýtir okkum saman við Venesuela og hernaðarligu inntrivini har, so er tað ikki bara skeivt. Tað er óvirðiligt, sigur Jens-Fredrik Nielsen.
- Land okkara er ikki ein partur av stórveldisretorikki. Vit eru eitt fólk. Eitt land. Eitt fólkaræði. Hetta má virðast. Serliga av okkara nærmastu og trúføstu vinum.
- Ikki meira trýst. Ikki fleiri ábendingar. Ikki meira dreymatos um hertøku, sigur grønlendski stjórnarleiðarin.
Í staðin vísir hann á, at Naalakkersuisut er opið fyri samrøðum.
- Men tað skal vera umvegis tær røttu kanalirnar í í virðing fyri fólkarættinum.
- Grønland er heim okkara og okkara øki. Og soleiðis verður tað framhaldandi, sigur Jens-Fredrik Nielsen.
Vinarliga broyt tínar kennifíla - og privatlívsstillingar fyri at síggja hetta innihald