Jónsvein Mikkelsen heiðraður fyri trúgva tænastu

27. mars var hátíðargudstænasta í Fríðrikskirkjuni á Nesi. Hetta í sambandi við, at Jónsvein Mikkelsen fekk handað kongaligt heiðurstekin fyri trúgva og drúgva tænastu sum urguleikari í Nes kirkjusókn.

Jónsvein er leirvíkingur, og longu sum heilt ungur byrjaði hann at spæla í kirkju. Í 73 ár hevur hann sostatt leikt á kirkjuurgur, nú han mynstraði av tíðliga í 2020. Fleiri av hesum árum í Nes kirkjusókn. Tað er í Nes kirkju og Fríðrikskirkjuni, skrivar Fólkakirkjan á netinum.

Jónsvein Bech hevði formessuna, Ovi Brim, prestur, prædiku og Jógvan Fríðriksson, biskupur hevði heilsanina í hesum sambandi. Biskupur nevndi eisini Jonu, konu Jónsveins, sum trúføst hevur stuðlað honum øll hesi árini kirkjutænastu.

Kirkjukórið undir leiðlsu av Mikael J. Heinesen luttók eisini. Jónsvein hevur sungið í kirkjukórinum í fleiri ár.

Undan gudstænastuni hevði kirkjuráðið boðið kirkjuliðnum til morgunmat. 

(Mynd: Torleif Johannesen)