Kadeau Copenhagen vitjar á RÆST

Komandi leygarkvøld – 5. apríl – fær føroyska matmentanin forkunnuga vitjan, tá Nicolai Nørregaard, høvuðskokkur og ein av stovnarunum av Kadeau-matstovunum, saman við sínum toymi, kemur til Føroyar, at skapa eina heilt serliga matuppliving.

Nicolai Nørregaard, køvuðskokkur á Kadeau (Mynd: Mikkel Heriba / Kadeau)

Nicolai Nørregaard er sjálvlærdur kokkur, og stovnaði Kadeau í 2007 saman við barndómsvinunum, Rasmus og Magnus Kofoed. Fyrsta matstovan byrjaði á Bornholm, grundað á djúpari virðing fyri náttúruni og staðbundnum rávørum, har súlting, fermentering og royking spæla ein serligan leiklut í matgerðini.

Tað, sum byrjaði sum eitt lítið konsept, er í dag ein týdningarmikil leikari á altjóða matleikvøllinum. Í dag umsita Nørregaard og Kofoed-brøðurnar tvær matstovur í Danmark, Kadeau Bornholm við einari Michelin-stjørnu og Kadeau Copenhagen við tveimum Michelin-stjørnum.

Kadeau er kent fyri sín kreativa, náttúrliga og smakkríka nýnorðurlendska køk. Í samstarvi við høvuðskokkin á RÆST, Sebastian Jiménez, og RÆST-toymið, verður hetta kvøldið eitt serstakt møti millum føroysku fermenteraðu matmentanina og danska nútímakøkin.

Á skránni verða rættir við fokus á fermentering, royktar og eldgrillaðar smakkir, og tær bestu rávørurnar bæði úr tí føroysku og tí donsku náttúruni.

Borðbílegging her (trýst á ‘Table booking for special events’)

Ræst-toymið. Fremst Sebastian Jiménez, høvuðskokkur, kona hansara Fernanda Hernandez, kondittari, og Vanesa Vaquez, matstovuleiðari (Mynd: Birgir Kruse / Birkblog)