Kunningarkvøld fyri avvarðandi hjá teimum við demens

Tað gerast alsamt fleiri, sum fáa staðfest sjúkuna demens. Sjúkan rakar eisini avvarðandi, sum mangan kenna seg einsamøll og máttleys.

Hetta skrivar Vága kommuna á heimasíðu sínari, í samband við at Eldraráðið og Vesturvón bjóða til serligt kunningarkvøld í venjingarhølinum á Heiminum á Sýnini í kvøld, týsdagin 30. mai.

Møguleiki verður fyri at hoyra hvat Alzheimersfelagið ger fyri at varpa ljós á hesa álvarsligu sjúku, og hvussu tey stuðla og hjálpa borgarum við demens og avvarðandi teirra.

- Eisini eru vit so heppin, at vit hava fingið Svannu Jákupsdóttir, sum er avvarðandi, at koma og siga frá síni søgu. Hon hevur givið út eitt yrkingasavn, sum snýr seg um at vera nær einum menniskja, sum spakuliga forferst og hvørvur. Savnið viðgerð kenslur og tankar, ið fylgja við, tá ið ein av okkara næstingum alt ov ungur, gerst ólekjandi minnisveikur.

Vónandi kann hetta kunningarkvøld eisini verða við til at skapa sambond millum avvarðandi, skrivar vaga.fo.

Tiltakið í Miðvági byrjar klokkan 19.