“Lívið er handað” – triðja lagið á Følv

Í dag, hósdagin 19. mai, letur Mourits Mohr Joensen út triðja sangin, sum hann hevur latið spælt inn og hevur givið út á tónleikaútgávuni Følv.

Følv eru trý løg, ið Mourits hevur skrivað bæði tekst og løg til. Talan er um “Litfagrir fuglar”, “Titrandi sansir” og “Lívið er handað”.

Fyrsta lagið, “Litfagrir fuglar”, sum Rókur Jákupsson syngur, kom út 12. februar. Næsta lagið, “Titrandi sansir”,  sum Edith Dahl Jakobsen syngur, kom út 16. mars.

Í dag kemur lagið “Lívið er handað” út. Hesaferð er tað Benjamin Petersen, ið syngur.

- Eg havi valt, at lagið skal koma út 19. mai, tí tað er føðingardagurin hjá mínum góða vini Hildibjarti Hansen, ið andaðist 19. apríl í fjørð. Orðini gjørdi eg í august 1999, tá okkara kæra grannakona, Anna Poulsen, andaðist bert 46 ára gomul. Teirra hurð og okkara hurð er sum ein, so tað tók fast tá hon fór, greiðir Mourits Mohr Joensen frá.

- “Lívið er handað” hevði ligið í skjótt 21 ár í eini skuffu. Tá systir mín, Hanna Kampmann, andaðist í august 2020, tók eg yrkingina framaftur, og setti lag til. Yrkingin er ognað Onnu Poulsen, grannakonuni, meðan lagið er ognað Honnu Kampmann, systi míni.

Upptøkurnar eru gjørdar í Bunkaranum, ið er upptøkuhølið hjá Mikael Blak og Benjamin Petersen.

Tónleikararnir á útgávuni eru hesir:

Sang og guitarar: Son of Fortune (Benjamin Petersen)
Violin: Heiðrun Petersen
Bass og tangentar: Mikael Blak
Trummur: Per Ingavldur Højgaard Petersen
Permumynd: Anna Poulsen, sála