Løgtingsbygningur umvælast fyri 34,2 milliónir krónur

Formansskapurin í Løgtinginum - Bjørt Samuelsen, Elsebeth Mercedis Gunnleygsdóttur, Johan Dahl, og Jóhannis Joensen - hevur lagt fram uppskot um at játta 34,2 milliónir krónur til umvæling av umsitingarbygningin hjá løgtinginum, gomlu telefonstøðina.

Tá onkrar av glasplátunum uttan á bygninginum brotnaðu í fjør, varð farið at kanna bygningin nærri. Øll glasfasadan er tikin niður, og staðfest er, at bygningurin má umvælast heilt inn á betong, eins og nógv vindeygu og hurðar mugu skiftast, skrivar fomansskapurin í viðmerking til uppskotið.

Klædningurin er lutvíst eitt listaverk, og tað verður endurskapt í nýggju loysnini, tó við nýggjum haldbarum glasi og festum.

Klædningurin á bygninginum verður høvuðsumvældur og gjørdur av nýggjum sambært galdandi bygningskunngerð og fer sostatt eisini at vera orkudyggari. Arkitektoniska úttrykkið av bygninginum verður í høvuðsheitum varðveitt og fer at síggja út, sum bygningurin hevur sæð út higartil, tó við neyðugum tillagingum í mun til haldbari, konstruktiónir v.m., umframt at haldbar festing av glaslistini skal tryggjast.

Arbeiðið byrjar eftir ætlan fyrst í 2026 og væntast at vera liðugt við árslok 2026, men um veðrið ikki er til vildar í mun til uppsetan av glaslistini, so tíðliga í 2027.

Útboð hevur verið av verkætlanini, og høvuðsarbeiðstakari er funnin.

Metti kostnaðurin av verkætlanini er umleið 34,2 milliónir krónur. Harumframt eru longu nýttar umleið 3,5 milliónir í 2024 og 2025 til niðurtøku av glasi, nærri kanningar av bygninginum og til prosjektering av hesari verkætlanini at umvæla bygningin aftur. Tær 34,2 milliónirnar, sum skulu nýtast afturat, verða fíggjaðar á fíggjarlógini fyri 2026 og við einari átekning um, at ikki nýtt játtan kann flytast til 2027, um onkrir partar av verkætlanini ikki eru lidnir við árslok 2026, verður sagt.