Løgtingsformaðurin fær rætt til bústað

Eftir nýggja uppskotinum um samsýning til løgtingsfólk, fáa løgtingsformenn, sum hava bústað uttanfyri høvuðsstaðin, rætt til goldnan bústað í Havnini.

Jonhard Klettheyggj, stjóri í løgtingsumsitingini, sigur, at talan er um broyting, sum arbeiðsbólkurin, ið hevur arbeitt við nýggja uppskotinum, er komin við. Bólkurin hevur mælt til, at løgtingsformaðurin verður javnsettur við løgmann í øllum viðurskiftum og ikki bara í lønarviðurskiftum, sum hevur verið galdandi áður. 

Les eisini: Løgtingsfólk fáa lønarhækkan upp á 6000 krónur  

Løgmaður hevur havt rætt til frían bústað í høvuðsstaðnum, um hann er búsitandi uttanfyri høvuðsstaðin síðani lógin um samsýning til landsstýrisfólk varð broytt í 2015. 

Afturat hesum fær løgtingsformaðurin eisini rætt til flutningskostna við egnum bili við Strandaraskipum Landsins ella til tunnilsgjald 200 ferðir aftur og fram árliga. 

Løgtingsformenn úr Tórshavn, Hoyvík, á Argjum og Hvítanesi fáa ikki hesi kostnaðarendurgjald. 

Um lógin verður samtykt, verður hon galdandi eftir næsta løgtingsval.