Løkke: Sjúklingar í Gaza skulu fáa viðgerð í Eysturjerusalem

Danski uttanríkismálaráðharrin, Lars Løkke Rasmussen vil hava Ísrael at loyva palestinum úr Gaza at fáa sjúkrahúsviðgerð í Eysturjerusalem og Vestara Áarbakka.

Tað segði hann á tíðindafundi fyrrapartin í dag í sambandi við vitjan sínari í Ísrael, skrivar Ritzau.

Løkke hevur áður skotið upp at seta av 30 milliónir krónur til viðgerð av álvarsliga løstaðum palestinum úr Gaza. Hendan viðgerðin skal verða á sjúkrahúsum í Eysturjerusalem. Ísrael hevur tó ikki tikið av tilboðnum.

Á tíðindafundinum kom Løkke eisini við áheitan á Ísrael um at steðga álopini í Gaza.

Danski uttanríkismálaráðharrin vitjar í dag bæði í Ísrael og hersettum palestinskum økjum.