Metstór føroysk luttøka á viðurkenda Great Escape Festivalinum

FMX: Føroyar hava í fleiri ár verið væl umboðaðar á viðurkenda showcasefestivalinum The Great Escape. Við stórari gleði kundu vit síðst í 2024 almannakunngera, at føroysk tónleikavinna tók næsta risafetið, tá Føroyar vórðu valdar av festivalinum til at vera fokusland í 2025. Sum kunnugt varð henda kunngerðin tíverri tikin aftur av politiskum orsøkum bert eina viku seinni.

Sí eisini: Grindadráp forðar Føroyum at veruliga koma í sjóneykuna

Sí eisini: Løgd undir at vera ein propagandastovunur hjá føroyska landsstýrinum

Hóast hetta bakkastið hava vit nú stóru gleðina at kunna avdúka, at Føroyar kortini verða ómetaliga væl umboðaðar á festivalinum í 2025, við metstórari luttøku. Heili átta (8!) tónlistafólk og bólkar úr Føroyum luttaka.

Tónlistafólkini og bólkarnir, sum nú eru váttaðir og kunngjørdir til festivalin, eru: Eivør, Tamara Mneney, Elinborg, Jazzygold, Silvurdrongur, Joe & The Shitboys, Ragnar Finsson og Aggrasoppar

- Vit eru ótrúliga fegin um, at framgongdin heldur fram," sigur Glenn Larsen, leiðari fyri Faroe Music Export (FMX). "Festivalurin er ein týdningarmikil pallur, sum kann styrkja føroyska tónleikaútflutningin, og áhugin fyri Føroyum og okkara tónleikaídnaði veksur støðugt. Hóast samstarvið við festivalin um framtakið fyri Føroyar í 2025 ikki gekk sum ætlað í byrjanini, gleða vit okkum nú til at sýna okkum fram í mai."

- Onkur tónleikanøvn er boðin aftur, og tað er av fleiri orsøkum," greiðir hann víðari frá. "Tá vit upprunaliga gjørdu avtalu um, at Føroyar skuldu vera fokusland, fóru vit beinanvegin undir at menna hugskot saman við festivalinum um, hvat skuldi henda. Nøkur av hesum hugskotum verða framvegis framd, hóast tingini ikki gjørdust heilt sum ætlað. Eivør spælir til dømis eina stóra konsert á einum av teimum størstu pallunum, meðan Joe & The Shitboys eru valdir at kuratera sítt egna konsertkvøld, har teir velja tríggjar aðrar útlendskar bólkar at spæla á sama palli. Hetta kvøldið er kanska serliga ætlað LGBT-umhvørvinum, men tað er opið fyri øllum. Vit kunnu venda tí við og kalla tað eitt "straight-vinaligt "-tiltak, sum er heilt í andanum hjá Joe & The Shitboys," greiðir hann frá.

Glenn leggur afturat:  -Aggrasoppar gjørdi øll ovfarin við at vinna Steve Strange-heiðurslønina fyri 2024, og hetta gjørdi tað sjálvsagt fyri festivalin at bjóða teimum aftur í 2025. Hetta er eitt stórt góðskustempul, sum fer at lata fleiri dyr upp fyri teimum.”

- Elinborg er longu kunngjørd og marknaðarførd á festivalinum sum ein partur av "First Fifty"-listanum. Stutt sagt merkir hetta, at hon er millum tey fyrstu 50 tónlistafólkini, sum vórðu kunngjørd, og hetta vísir greitt, at bookingbólkurin á festivalinum veruliga trýr upp á hana sum tónlistafólk,” sigur Glenn víðari.

- Tá talan er um Jazzygold, hevur festivalurin lagt merki til hennara jaligu menning seinastu tvey árini. Samstundis hevur hon givið sína debut-EP út áðrenn festivalin, og hetta hevur við sær, at bookingbólkurin við stórum eldhuga nú hevur boðið hana aftur til festivalin, greiðir Glenn frá.

- Ragnar Finsson, Tamara Mneney og Silvurdrongur eru øll nýggj fyri altjóða áhoyrarar og tónleikavinnuna, men eg eri sannførdur um, at tey eru klár til næsta stigið og fara at fáa nógv burturúr showcasefestivalinum. Tað verður framvegis tosað um fantastisku framførsluna hjá Silvurdrongi á Iceland Airwaves í november," endar Glenn Larsen.

Øll tey føroysku listafólkini fara at framføra tvær konsertir hvør, báðar sum part av almennu festivalsskránni. Afturat konsertunum verður ein vinnuráðstevna við áhugaverdum pallborðum, viðkomandi kjaki, høvuðsrøðum og góðum møguleikum fyri netverkan. Ein stórur hópur úr føroysku tónleikavinnuni verður væntandi við á festivalinum.

Um The Great Escape:
The Great Escape Festival er ein tónleikafestivalur, sum varar í tríggjar dagar. Hann verður hildin har suðuri í Brighton í Englandi hvørt ár í mai. Festivalurin verður fyriskipaður av MAMA Festivals og sýnir fram nýggjan tónleik úr øllum heiminum og í alskyns tónleikasjangrum. Festivalurin varð stovnaður í 2006 og hýsir umleið 300 tónleikabólkum, sum spæla á 30 ymiskum pallum kring býin.

Festivalurin dregur til sín fólk í tónleikavinnuni úr øllum Evropa og aðrastaðni úr heiminum og hevur fleiri ferðir víst seg at vera ein týdningarmikil pallur fyri tónlistafólk at byrja sína yrkisleið – og ikki minst: ein serligur møguleiki at sýna seg fram fyri teimum størstu og týdningarmestu aktørunum, serliga í live-vinnuni.

The Great Escape er kendur sum ein showcasefestivalur, har fólk í tónleikavinnuni kunnu finna nýggj talent, og áhoyrarar fáa møguleika at uppliva tónlistafólk í einum meira intimum umhvørvi, áðrenn tey spæla á teimum stóru pallunum kring heimin. Seinastu árini hava Føroyar fingið alt meira pláss og alt meira uppmerksemi á hesum viðurkenda festivali.

Meira um The Great Escape HER.

The Great Escape verður í ár hildin í Brighton frá 14. til 17. mai.
 
Sitatir:

“Sum størsti og mest fjølbroytti nýggi tónleikafestivalurin í Stóra Bretlandi, er The Great Escape árliga tónleika- og upplivingarhátíðin í Brighton." – NME

"Um nakar ivaðist í, at The Great Escape er týdningarmesti tónleikafestivalurin í Stóra Bretlandi fyri nýggjar tónleikabólkar og nýggj rák, har ein kann finna nýggjar vinir, so var hesin ivin fullkomiliga burtur í ár. Eftir 10 ár stendur TGE sterkari og størri enn nakrantíð áður." – Crack

"Hóast festivalurin líkist mekka’num fyri nýggjan tónleik, SXSW í Texas, so er hendan bretska útgávan á mangan hátt betri: við lættari yvirliti, og minni merkt av marknaðarførdum nøvnum og við líka nógvum nýggjum talentum, sum spæla á smáum pallum kring Brighton." – The Times

"Festivalurin eigur eitt serligt pláss fyri seg sjálvan. Við einum sera altjóða line-up í einum sera bretskum býi, kann hann kappast við allar altjóða kappingarneytar og liggur ovast í Stóra Bretlandi, tá tað kemur til bæði virði og fjølbroytni." – Virtual Festivals

"The Great Escape hevur staðfest seg sum besta staðið í Evropa at finna nýggarj bólkar." – The Times

"Cannes fyri tónleikaheimin." – Steve Lamacq, BBC Radio 6 Music

"Sum ein av størstu tónleikashowcase-festivalunum í Evropa var The Great Escape í Brighton ein fantastisk byrjan upp á festivalárstíðina í Stóra Bretlandi. Við at umskapa hendan livandi strandarbýin til eitt mekka fyri tónleikaelskarar og framførandi tónleikarar … hevur The Great Escape aftur prógvað seg at vera ein stór suksess." – 1883 Magazine

"Ein festivalur, ið verður alsamt meira spennandi og trendsetandi … [Ein] vill framførsla í einum lítlum, heitum klubba eitt fríggjakvøld er júst tað slagið av "Vart tú har?" løtum, sum ger The Great Escape, ja, Great." – Will Hodgkinson, Chief Pop & Rock Critic, The Times