Metstór hjálp til Svøríki

Heili átta lond í ES hava sent hjálp til Svøríki, har stórir skógareldar herja. Tilsamans eru fleiri enn 340 fólk, sjey tyrlur, 60 akfør og sjey flogfør er send at sløkkja eldarnar.

Londini, sum hava sent hjálp eru Danmark, Frakland, Italia, Týskland, Litava, Portugal, Pólland og Eysturríki. Hetta er størsta ES-tilbúgvingin móti skógareldi nakrantíð. Umframt ES-londini hevur Noreg sent tíggju tyrlur at hjálpa, skrivar DR.

ES-kommissjónin sigur, at skógareldarnir prógva, at veðurlagsbroytingar eru veruligar, og at einki land er mótstøðuført fyri náttúruvanlukkur.