Mette F. fegnast um samstarvsráðið

Mette Frederiksen, forsætisráðkvinna, nýtti høvið at fegnast um, at tað nú er skipað eitt samstarvsráð á stjórnarstøði millum Danmark, Grønland og Føroyar, tá hon fyrrapartin helt sína árligu stjórnarleiðararøðu í sambandi við at fólkatingsárið byrjaði henda fyrsta týsdag í oktober.

Hon greiddi frá, at Danmark saman við Grønlandi og Føroyum arbeiða út frá einum felags málsetningi um lágspenning í arktiska økinum. Og at verja okkum sjálvi, eitt nú móti ‘cyper-njósning.

- Det kræver årvågenhed. Og opbygning af kapacitet, staðfesti Mette Frederiksen.

Og tí fegnaðist hon um, at londini nú hava stovnað eitt fast samstarvsráð á stjórnarstøði, ið skal brúkast til “tæt dialog om udenrigspolitik. Sikkerhedspolitik. Og forsvarspolitik”.

Hon greiddi eisini frá, at Grønland og Føroyar fáa ein meira týðuligan leiklut í Arktiska ráðnum, nakað, ið sambært Mette Frederiksen er “helt naturligt”.

- Í farnu viku og í hesari vikuni havi eg havt orðaskiftið við løgmann og við formannin í Naalakkersuisut. Vit hava júst skrivað undir arbeiðssetningin – kommisoriið.

- Tit eru báðir til staðar her í Fólkatinginum í dag. Eg vil nýta høvið til at takka tykkum fyri gott og uppbyggjandi samstarv, segði Mette Frederiksen í setanarrøðuni. Hon takkaði í sama viðfangi eisini norðuratlantisku fólkatingslimunum fyri samstarv.

Eitt sindur merkisvert er tað, at forsætisráðkvinnan í røðu síni ongantíð brúkti orðið ‘ríkisfelagsskapur’.

Brot á stýrisskipanina
Avtalan, sum Bárður á Steig Nielsen, løgmaður, hevur skrivað undir í Keypmannahavn er eitt greitt brot á stýrisskipanarlógina.

Tað heldur Høgni Hoydal, formaður í Tjóðveldi, um samstarvsavtaluna. Høgni Hoydal var gestur í sendingini Breddin í útvarpinum hjá Kringvarpinum fyrrapartin. Hann heldur, at tað verður eitt stórt afturstig fyri føroyskan politikk, at týðandi mál nú skulu viðgerast í einum slíkum samstarvsráð, áðrenn tey koma fyri løgtingið.

Christian Andreasen úr Fólkaflokkinum, sum eisini var við í kjakinum, er ikki samdur í hesum, og hevur eina heilt aðra fatan av avtaluni, sum nú er gjørd millum Danmark, Grønland og Føroyar.

Tú kanst hoyra Breddan her. Kjakið um samstarvsráðið byrjar eftir uml. 11 minuttir