Uttanlands

Mike Pence vil ikki brúka 25. grundlógarískoytið

Bæði demokratar og republikanarar vilja hava varaforsetan at brúka ískoytið at seta Donald Trump frá sum forseti, men ráðgevar hjá Pence upplýsa, at tað vil hann ikki

Amerikanski varaforsetin, Mike Pence (Mynd: EPA)

Amerikanski varaforsetin, Mike Pence (Mynd: EPA)

2021-01-08 08:15 Author image
Alda Nielsdóttir
placeholder

Fleiri demokratar og republikanarar hava heitt á amerikanska varaforsetan, Mike Pence, um at brúka 25. ískoytið til amerikansku grundlógina at seta Donald Trump frá sum forseta.

Talan er um eitt ískoyti, sum kann brúkast til at koyra ein forseta frá, um hann ikki er førur fyri at røkja embætið.

Men ráðgevar hjá varaforsetanum upplýsa sambært amerikonskum miðlum, at Mike Pence ikki vil brúka hendan møguleikan. Tó hevur hann ikki sjálvur úttalað seg um málið enn.

Les eisini: Umhugsa at seta Donald Trump frá

Millum tey, sum hava heitt á varaforsetan um at brúka hetta grundlógarískoytið eru demokratiski leiðarin í Umboðsmannatinginum, Nancy Pelosi, sum sambært Ritzau ikki kann útiloka eitt nýtt ríkisrættarmál móti Trump.

Onnur, sum hava heitt á Mike Pence um at brúka 25. ískoytið eru republikanski kongresslimurin Adam Kinzinger og demokratiski leiðarin í Senatinum, Chuck Schumer.

Áheitanirnar til Mike Pence koma eftir at Kongressin í Washington D.C. mikudagin varð álopin av fleiri hundrað viðhaldsfólkum hjá Donald Trump.

Sí eisini: Myndir: Mótmælisfólkini trongdu seg heilt inn í formansskrivstovuna

Undir ófriðinum legði amerikanski forsetin m.a. eitt sjónband á sosialu miðlarnar, har hann segði seg elska og skilja viðhaldsfólkini.

Fleiri dagføringar hjá Donald Trump vórðu strikaðar av sosialu miðlunum mikudagin, og tað endaði við, at hann varð útistongdur frá Twitter, Facebook og Instagram.

Les eisini: Donald Trump viðurkennur tap - er útistongdur frá sosialum miðlum

Les eisini: USA: Tveir ráðharrar lagt frá sær

placeholder
placeholder