Netanyahu lovar at fáa allar gíslar heim

Ísrael arbeiðir framvegis við at fáa allar gíslar í Gaza leyslatnar.

Tað skrivaði ísraelski forsætisráðharrin, Benjamin Netanyahu á sosiala miðilin X týsdagin, tá júst tvey ár vóru liðin síðan álopið hjá Hamas á Ísrael 7. oktober 2023.

Samráðingar millum Ísrael og Hamas eru í Egyptalandi í hesum døgum, og sambært Netanyahu eru hetta nakrir lagnutungir dagar.

– Vit vilja halda fram at arbeiða fyri at náa øll málini við krígnum: At fáa allar gíslar heim, at beina fyri Hamas-stýrinum, og lyftið um, at Gaza ikki longur skal vera ein hóttan móti Ísrael, skrivar hann sambært Ritzau.

Sambært ísraelska herinum eru 48 av teimum 251 gíslunum, sum vórðu tiknir av Hamas fyri tveimum árum síðani, framvegis í Gaza, og 25 av teimum eru deyðir.