Alda Nielsdóttir
Norski miðilin NRK, sigur seg hava fingið at vita frá dulnevndum keldum, at amerikanski forsetin Joe Biden á fundi við Jens Stoltenberg, Nato-aðalskrivara heitti á hann um at halda fram, hóast hann hevði ætlanir um at gevast í heyst.
Orsøkin sigst at vera, at tað ikki hevur verið møguligt at finna nakran annan, sum hevur breiða undirtøku millum Nato-limalond, og tað er neyðugt við undirtøku frá øllum limalondunum, tá ein nýggjur leiðari skal veljast.
Eisini skal Biden hava víst á, at tað, nú kríggj er í Ukraina, ikki er tíð til, at óvissa er um, hvør skal standa á odda fyri Nato. Harafturat er tað enn ógreitt, hvussu verður við møguliga Nato-limaskapinum hjá Svøríki.
Jens Stoltenberg hevur sitið sum Nato-aðalskrivari síðan 2014. Hann hevur sitið í tvey fýraáraskeið, og í fjør longdi hann sína embætistíð við einum ári orsakað av krígnum í Ukraina.
Stoltenberg hevur fleri ferðir sagt, at hann ætlar at gevast í heyst, og at hann ongar ætlanir hevur um at leingja sína embætistíð eina ferð afturat. Men fyrradagin segði hann tó, at tað er upp til Nato-limalondini at avgera framtíð hansara.
Í juli verður Nato-toppfundur í litavska høvuðsstaðnum Vilnius, har avgerð skal takast um, hvør verður Nato-aðalskrivari komandi tíðina.
Les eisini: Stoltenberg: Nato-londini avgera mína framtíð
Vinarliga broyt tínar kennifíla - og privatlívsstillingar fyri at síggja hetta innihald