Nú ber til at melda seg til Sement 2022

Ársins útgáva av tónleikakappingini Sement verður í apríl, og nú ber til hjá tónleikarum at melda seg til kappingina. 

Freistin at melda seg til Sement 2022 er 1. mars klokkan 12. Innleiðandi umførini í kappingini verða 9., 16. og 23. apríl, og finalan verður 30. apríl.

Treytirnar fyri at luttaka á Sement eru soljóðandi:

• hvør bólkur hevur 15 minuttir á pallinum
  
• øll løgini skulu vera egin løg og ikki útgivin áður
  
• tónleikarar kunnu spæla í trimum bólkum men bert tveir tónleikarar kunnu ganga aftur í somu bólkum
  
• bólkur, ið áður hevur vunnið Sement, sleppur ikki at luttaka
  

Fyriskiparar leggja afturat í tíðindaskrivi, at vinningarnir verða enn betri enn seinasta ár. Hvat hetta inniber, er tó ikki upplýst, men undanfarin ár hava vinnarar m.a. vunnið tíð í upptøkustudio.

Tey, ið ynskja at melda seg til Sement 2022 kunnu gera tað á heimasíðuni hjá Tórsgøtu.