Ari av Rana
Seinnapartin fríggjadagin varð tendrað fyri ferðsluljósunum við nýggju ferðsluloysina við Skúlatrøð. Harvið er ferðsluloysnin við Gerðagøtu nú endaliga tikin í nýtslu, og kunnu bæði bilar og fólk til gongu nú ferðast tryggari.
Tað var Óli M. Lassen, formaður í teknisku nevnd, ið trýstið á knøttin, og børnini í Dr. Margrethu barnagarði vóru tey fyrstu, ið gingu á nýggja gonguteiginum. Til staðar vóru umboð fyri kommununa, TTS, ið hevur staðið fyri ljósarbeiðinum, og umboð fyri politiið.
Jógvan Skorheim, borgarstjóri, fegnaðist um góða úrslitið og ikki minst um, at nú er fingin ein góð og trygg farleið til mongu skúla- og barnagarðsbørnini.
- Tað hevur serliga stóran týdning at økið nú er greitt uppmerkt og verður ljósregulerað, sigur Jógvan Skorheim.
Eftir at asfaltsarbeiðið varð gjørt síðst í novembur, hevur verið bíðað eftir seinastu smálutunum, so sum skeltum og ljósviðurskiftum, ið vóru endaliga avgreidd fríggjadagin, skrivar Klaksvíkar kommuna. Gerðagøta er ein av mest brúktu vegunum í býnum, bæði til og úr Klaksvíkini, eins og vegurin er sera nógv brúktur av børnum, sum hvønn dag ganga í barnagarði, skúla og til frítíðarítriv; tí er nú avgreidda ferðsluloysnin, við øktari ferðslutrygd og góðum av og ásetingar møguleikum, eitt týdningarmikið stig at betra um farleiðina og samstundis økja um trygdina.
Vinarliga broyt tínar kennifíla - og privatlívsstillingar fyri at síggja hetta innihald