Nýsæland: Ferðafólk skulu gjalda fyri at vitja ávís ferðamál

Framyvir skulu ferðafólk í Nýsælandi gjalda fyri at vitja vælumtókt ferðamál.

Lokal fólk kunnu framvegis vitja hesi ferðamál púra ókeypis, men ferðafólk skulu rinda millum 20 og 40 nýsælendskar dollarar, sum svarar til millum 76 og 152 krónur, skrivar Ritzau.

– Ferðavinnan hevur stóra ávirkan á okkara búskap, og tað ynskir eingin at broyta. Men eg havi hoyrt fleiri ferðir frá vinfólki, sum hava vitjað okkum, at tey eru skelkað yvir, at tey ókeypis kunnu vitja nøkur av vakrastu støðunum í heiminum, sigur Tama Potaka, ráðharri í náttúruverndarmálum.

Avgjaldið til ferðafólk er ein liður í tiltøkunum hjá stjórnini um at styrkja ferðavinnuna og fáa gongd á búskapinum.