Nýtt hitamet sett í Japan í dag

Japanski veðurstovnurin hevur í dag skrásett eitt nýtt hitamet í japanska býnum Isesaki.

Í dag vórðu skrásett 41,8 hitastig í eysturjapanska býnum. Gamla metið varð sett í farnu viku, tá 41,2 hitastig vórðu skrásett í býnum Tamba.

Myndugleikarnir í Japan heita á fólk um at halda seg innandura.

Hetta summarið hevur Japan verið rakt av ógvusligari hitabylgju, og juli 2025 varð skrásettur sum heitasti julimánaðurin nakrantíð. Hetta er triðja árið á rað, at julimánaðurin hevur sett met í Japan, skrivar Reuters.

Í summar eru fleiri enn 53.000 fólk innløgd við hitaslagi.