Óvanliga nógv fólk í býnum í nátt

Løgreglan hevur havt úr at gera í nátt. Vaktleiðarin á politistøðini upplýsir, at óvanliga nógv fólk vóru í býnum 2. jólakvøld.

- Telefonin hevur ringt so at siga í alla nátt við ymsum málum, sum løgreglan hevur verið drigin uppí.

Nógv full fólk skuldu hjálpast, serliga í Havn, og løgreglan hjálpti eini seks fólkum við at koyra tey til hús.

Eisini hava verið tvey mál, sum møguliga enda við at gerast harðskapsmál, upplýsir vaktleiðarin á politistøðini. Hann sigur, at málini verða kannað nærri í dag.

- Vit fara í dag at tosa nærri við tey, sum hava boðað frá harðskapsmálunum fyri at finna útav, um reisast skal ein ákæra, sigur vaktleiðarin. Talan er um fólk, sum eru blivin sligin.