Planeringin til næmingabústaðin farin í gongd

Í apríl varð spakin settur í. Í mai varð grivið út. Og nú er gongd komið á planeringina av økinum, har nýggi næmingabústaðurin til Ítróttaháskúlan í Suðuroy skal byggjast. Hetta skrivar Vága Kommuna á heimasíðu sínari.

Tá liðugt er at planera verður farið undir at stoypta fundamentini til bygningin.

Bústaðir er byggiharri, og tað er Norcon í Vági, sum byggir næmingabústaðin, sum Ítróttaháskúlin í Suðuroy kemur at leiga frá Bústaðir.

Í næmingabústaðinum verða 24 kømur, sum eru ætlaði til tveir ella tríggjar næmingar, alt eftir hvør aldursbólkurin er. Harumframt verður eisini stórur matarsalur, arbeiðsrúm til næmingar, uppihaldsrúm, skrivstova, køkur o.s.fr.

Næmingaheimið skal eftir ætlan standa liðugt komandi summar.