Runavíkar kommuna hevur latið Eysturkommunu ein hamara

- Í dag fingu vit í Eysturkommunu eina gávu frá grannanum fyri sunnan

Soleiðis byrjar borgarstjórin í Eysturkommunu eitt Facebook-uppslag frá fyrr í dag. Per Martin Gregersen greiðir frá, at tað ikki hevur verið nakar hamari knýttur at býráðssalinum í Eysturkommunu.

Hetta legði borgarstjórin í Runavíkar kommunu, og syðrugøtumaðurin, til merkis, tá hann var á vitjan í býráðssalinum í Norðragøtu fyri stuttum.

Tórbjørn Jacobsen var ein av teimum, ið helt fyri, at ein hamari átti at vera í salinum, og nú kann borgarstjórin í Eysturkommunu staðfesta, at tað kann verða stutt frá tanka til handling..

- Í dag er hamarin komin at liggja har hann helst kemur at verða í fleiri ár fram yvir. Stóra takk fyri gávuna.

Runavíkar kommuna hevur latið Eysturkommunu snotliga hamaran, ið Kristian Edvard Knudsen hevur tilevnað.

(Myndir: Per Martin Gregersen)