Sethúsaprísirnir halda støðið

Miðal bústaðarprísirnir fyri 1. ársfjórðing 2023 broyttist minni enn 1 prosent í Tórshavn, Eysturoynni og í miðal fyri alt landið, samanborið við miðalprísin í 4. ársfjórðingi 2022.

*Samlaða talið av sethúsasølum í 1. ársfjórðingi er ikki tøkt, og tí skulu hesi tølini takast við fyrivarni

Í fyrsta ársfjórðingi í ár kostaðu eini miðal sethús í Tórshavn 3,7 mió., í Eysturoynni 2,1 mió. og í miðal fyri alt landið 2,4 mió. krónur.

Hinvegin síggja vit eitt fall í miðal sethúsaprísunum í 1. ársfjórðingi 2023 samanborið við alt 2022. Í Tórshavn er miðalprísurin fallin áleið 6 prosent, í Eysturoynni áleið 2 prosent og í miðal fyri alt landið áleið 10 prosent.

Miðal bústaðarbyrðan í Føroyum er óbroytt
Bústaðarbyrðan lýsir, hvussu stóran part av inntøkuni eftir skatt eitt par við tveimum børnum undir 7 ár skal brúka upp á at gjalda sítt bústaðarlán.

Í 2022 var bústaðarbyrðan í Tórshavn og í Eysturoynni ávikavíst 37 og 20 prosent. Í Føroyum var hon í miðal 25 prosent.

Higartil í ár er bústaðarbyrðan í Tórshavn og Eysturoynni ávikavíst 40 og 21 prosent. Í Føroyum er hon framvegis 25 prosent. Sostatt er bústaðarbyrðan í Tórshavn vorðin 3 prosentstig tyngri og í Eysturoynni 1 prosentstig tyngri.

Rentuhækkingarnar í fjør vórðu allar framdar í seinna hálvári. Av tí at vit nýta eina ársmiðalrentu at rokna bústaðarbyrðuna, síggjast rentuhækkingarnar bara partvíst aftur á bústaðarbyrðuni fyri 2022.

Um bústaðarbyrðan fyri 2022 varð roknað við rentuni við ársenda, hevði bústaðarbyrðan í Tórshavn, Eysturoynni og í Føroyum verið ávikavist 43, 22 og 27 prosent. Tískil varð væntað, at bústaðarbyrðan fór at gerast enn tyngri í ár. Tó er bústaðarbyrðan higartil í ár ikki vorðin so tung, sum væntað. Tað kemst m.a. av, at sethúsaprísirnir higartil í ár eru eitt vet lægri enn í fjør, og at tøka inntøkan hjá føroyingum í summum kommunum er hækkað.