Sjúklingur heintaður av Norrønu í morgun

Ein bjargingartyrla frá bretsku sjóbjargingartænastuni kom tíðliga í morgun út á Norrønu, sum er á veg úr Føroyum til Danmarkar.

Ørindini vóru at heinta eitt ferðafólk í land, ið var vorðið sjúkt umborð.

Ein talsmaður fyri bretsku ’coastguard’ váttar fyri skotska blaðnum Press & Journal, at ein tyrla í morgun varð send til Norrønu, sum var stødd vestan fyri Hetland.

Ein tyrla varð send út til Norrønu úr Sumburg eftir sjúklinginum, sum varð fluttur til Lerwick, skrivar Press & Journal.

Enn er óvist hvørjari støðu sjúklingurin er í.

Portalurin hevur verið í samband við Norrønu í dag, men av brúnni ynskja tey ikki at koma við viðmerkingum um tilburðin.