Skipa fyri borgarafundi um miðbýin í Havn

Mikukvøldið 15. mars skipa grannaløgini í miðbýnum í Havn fyri almennum fundi um býarskipan og nærdemokrati í sambandi við heildrætlanina "Urtagarðsbýurin", sum er seinasta uppskot frá Tórshavnar kommunu til broytingar í miðbýnum fyri at skapa meiri lív í.

Grannaløgini skriva soleiðis í tíðindaskrivi:

Tórshavnar Kommuna leggur upp til Urtagarðsbýin, men er tað har nærdemokratiið blómar? Grannaløgini í miðbýnum ivast stórliga og skipa tí aftur fyri almennum fundi um býarskipan og nærdemokrati. Vil tú sum borgari í Tórshavnar Kommunu taka lut í hesum, er tú vælkomin oman í Reinsaríið í Havn mikukvøldið 15. mars kl. 20.

Á skránni er:

• Michael Jacobæus hevur framløgu um “Lív í miðbýnum – nýggj ætlan fyri miðbýin”.
  
• Elin Hentze tosar um hvat er gott fyri ferðavinnuna.
  
• Elin Brimheim Heinesen fer at tosa um gentrifisering, sum hendir, tá áhugin fyri einum íbúðarøkið, sum íbúgvar hava gjørt sermerkt, veksur og spekulatión kemur uppí.
  
• Áhugafelagið “Havnar hugni” verður endurstovnað.
  
• Orðið er frítt millum tey, sum møta á fundinum.

Grannar við Tinghúsvegin,
á Reyni,
úti í Rættará,
miðbýurin fyri vestan
og við Havnará