Alda Nielsdóttir
James Cutfield, skiparin á játtini, sum í farnu viku sakk út fyri Italia, verður kannaður í sambandi við vanlukkuna.
Tað skriva italskir miðlar sambært Ritzau.
Játtin sakk tíðliga mánamorgunin 19. august, stutt eftir, at hon varð rakt av einari meldurhvirlu.
Skiparin er ikki skuldsettur í málinum, men sambært italskum ákærum verða allir møguleikar kannaðir, m.a. um skiparin kann skuldsetast fyri óviljað manndráp.
Cutfield er 51 ára gamal og úr Nýsælandi. Sunnudagin varð hann avhoyrdur fyri aðru ferð. Avhoyringin vardi í tveir tímar.
Ein annar av manningini, sum yvirlivdi vanlukkuna, og sum var á vakt, tá illveðrið rakti, verður møguliga eisini kannaður.
22 fólk vóru umborð á játtini, og sjey teirra lótu lív. Millum tey, sum lótu lív vóru bretski milliardingurin Mike Lynch og 18 ára gamla dóttir hansara, Hannah Lynch.
Vinarliga broyt tínar kennifíla - og privatlívsstillingar fyri at síggja hetta innihald