Skuld landskassans rentað við 0,7 prosentum í miðal í fjør

Rentan, sum Føroyar í miðal rindar fyri síni lán, er nógv minkað síðani 2011, og var við ársenda 2022 0,7 prostnt. Væntast kann tó at miðalrentan, sum landskassin skal rinda fyri sína skuld fer at hækka næstu árini, nú tjóðarbankarnir hava sett rentuna munandi upp.

Stabbamyndin vísir miðalrentuna við ársenda, sum landskassin rindar av láns­bræva­skuldini. Í 2022 rindaði landskassin í miðal 0,7 prosent í rentu av sínum lánum, sum við ársenda 2022 høvdu eitt marknaðarvirði á 3,5 milliardir krónur Rentan, sum Føroyar í miðal rinda fyri síni lán, er nógv minkað síðani 2011, tá landskassin í miðal rindaði gott 3 prosent í rentu av síni skuld.

Væntast kann, at miðalrentan, sum landskassin skal rinda fyri sína skuld fer at hækka næstu árini. Landskassin rindaði í juni 2022 eitt lán aftur á 1,3 milliardir krónur. Hetta var gjørt við, at landskassin tók ein nýtt lán á 1,1 milliard krónur, og rindaði 200 milliónir krónur aftur av skuldini av tøka gjaldførinum. Rentan á nýggja láninum er 1,25 prosent, og lánið er eitt tvey ára lán.

Næsta lán hjá landskassanum fellur til gjaldingar í juni í ár, og er 550 milliónir krónur stórt. Umframt endurfíggingina av teimum 550 milliónunum, er neyðugt at taka upp til 350 milliónir krónur afturat í láni. Hetta fyri at taka atlit at, at minstagjaldførið í 2023 er vaksið við 350 milliónum krónum. Væntst kann, at rentan á hesum nýggja lánið verður væl hægri, allarhelst millum 3 og 4 prosent.

Hóast bruttoskuldin við hesi eyka lántøku økist, so er nettoskuld landskassans tó enn tann sama, tí gjaldføri landskassans økist samstundis. Sannlíkt er tí, at landskassin fremur lántøku á upp til 900 milliónir krónur í vár. 

Kelda: Landsbanki Føroya