Sosialurin hevði gott úrslit hóast skerjingar

Smápartafelagið Sosialurin, sum stendur fyri miðlavirkseminum í Miðlahúsinum í Vágsbotni, kom úr árinum 2018 við 760.000 krónum í avlopi eftir skatt. 

Úrslitið er eitt lítið sindur lakari enn árið frammanundan, men má metast at vera eitt rímiligt úrslit, serliga tá tað framgongur av roknskapinum, at virksemið í felagnum er skert rættiliga munandi.

Roknskapurin vísir, at bruttovinningurin hjá felagnum er minkaður við 15,5 prosentum úr 11 milliónum krónum í 2017 til 9,3 milliónir í fjør. Samstundis eru starvsfólkaútreiðslurnar eisini minkaðar úr 10,2 milliónum í 2017 til 8,4 milliónir krónur í 2018, svarandi til eina lækking á 17,6 prosent.

Úrslitið hjá felagnum var sostatt 917.000 krónur áðrenn skattin, sum var á 158.000 krónur.

Svarar til miðlastuðulin
Í 2018 fekk Sosialurin 768.462 krónur í miðlastuðli frá landskassanum – úrslitið av roknskapinum á 759.000 krónur eftir skatt liggur sostatt rættiliga tætt við tað, sum felagið fekk inn í stuðli frá tí almenna.

Eginpeningurin hjá Pf. Sosialinum er nú komin upp á 7,3 milliónir krónur og skuldin niður 6,8 milliónir.

Fyri einum ári síðani fekk felagið eina átekning frá grannskoðaranum, eina sokallaða ’ongoing concern’-viðmerking, sum skyldaðist eina óvissu viðvíkjandi einari bókaðari skuld til móðurfelagið, Pf. Miðlafelagið. Hesa átekning er felagið nú sloppið av við í roknskapinum.

Grein um 2017 roknskapin sæst her: Blunkandi ávaringarlampur hóast gott úrslit 

Pf. Miðlafelagið, sum eigur Spf. Sosialin, hevði í 2018 eitt úrslit á góðar 500.000 krónur. Einasta inntøka í felagnum er tað, sum Sosialurin kastar av sær.

Eginpeningurin í hesum felag er framvegis negativur, men er batnaður við hálvari millión í 2018, so hann á nýggjárinum minus 1,4 milliónir krónur. Eigarar av Pf. Miðlafelagnum eru smápartafeløgini Spf. Barbara og Spf. Faroe Service, sum eru íløgufeløg hjá teimum báðum stjórunum, Eiriki Lindenskov og Jonhardi Hammer.