Alda Nielsdóttir
Sýriski forsetin, Ahmed al-Sharaa er í løtuni í USA, har hann skal hitta amerikanska forsetan, Donald Trump.
Fundurin við Trump verður eftir ætlan í Hvítu Húsunum í Washington D.C. mánadagin. Sambært greinarum er talan um fyrstu ferð, at ein syriskur forseti er á almennari vitjan í USA, síðan Sýria gjørdist sjálvstøðugt í 1946, skrivar Ritzau.
Trump og Al-Sharaa hittust fyrstu ferð í saudiarabiska høvuðsstaðnum Riyadh, har Trump vitjaði í mai.
Ahmed al-Sharaa hevur staðið á odda fyri uppreistrarbólkinum Hayat Tahrir al-Sham, sum spældi ein stóran leiklut í uppreistrinum móti Assad-stýrinum, sum í desember í fjør fór í søguna.
Hósdagin samtykti ST-trygdarráðið at strika revsitiltøkini móti Ahmed al-Sharaa, og fríggjadagin tók USA formliga sýriska forsetan av amerikanska yvirgangslistanum.
– Hesi tiltøk verða gjørd sum viðurkenning av teimum framstigum, sum sýriska leiðslan hevur gjørt, eftir Bashar al-Assad fór frá, og eftir meira enn 50 ára kúgan undir Assad-stýrinum, sigur talsfólk hjá amerikanska uttanríkismálaráðnum.
Ein kelda í Sýria sigur, at USA hevur ætlanir um at seta á stovn eina herstøð nær sýriska høvuðsstaðin Damaskus. Hetta verður gjørt fyri at samskipa neyðhjálp og eygleiða støðuna millum Sýria og Ísrael.
Vinarliga broyt tínar kennifíla - og privatlívsstillingar fyri at síggja hetta innihald