Talið á kanningum hjá Thetis setti aftur met í gjár

Fyrradagin gjørdi kanningarstovnurin Thetis 1.143 kanningar, sum var met hjá stovninum. Í gjár kannaði Thetis enn fleiri fólk, og hevur stovnurin sostatt sligið gamla metið frá hósdegnum.

Heili 1.901 fólk vórðu kannaði í gjár, skrivar Thetis á Facebook.

Marita Debess Magnussen, stjóri í Thetis, segði við Portalin í gjár, at talið hevur verið vaksandi, síðan korona aftur varð staðfest í samfelagnum.

Áðrenn ólavsøku tók stovnurin sær mest av at kanna ferðafólk, og lá dagliga talið á kanningum tá á uml. 3-400. Síðan smittan aftur varð staðfest, hava hundraðtals fólk vent sær til teirra.