Tilnevndu til Umhvørvisvirðisløn avdúkað 1. september

Hósdagin 1. september verður avdúkað, hvørji eru tilnevnd Umhvørvisvirðisløn Norðurlandaráðsins í ár.

Hetta verður gjørt í sambandi við fakligan kjakfund um náttúruloysnir í Norðurlandahúsinum, skrivar Norðurlandahúsið á heimasíðuna.

Á tiltakinum, sum byrjar klokkan 15, fara serfrøðingar, ung og avgerðartakarar at kjakast um týðningin av náttúruloysnum og á hvønn hátt tær kunnu setast í verk í Norðurlondum. Eisini verður greitt nærri frá um fýra-ára verkætlanina Náttúruloysnir, sum er sett í gongd av Norðurlendska Ráðharraráðnum, og verður samskipað á Umhvørvisstovuni í Føroyum.

Jóna Ólavsdóttir, samskipari fyri programmið Náttúruloysnir hjá Norðurlendska Ráðharraráðnum, heldur framløgu, og eisini verður pallborðskjak, har hesi luttaka:

• Kolbrún í Haraldsstovu, verkætlanarleiðari á verkætlanini Lendisbati og leiðari á plantudeildini á Tjóðsavninum
  
• Hafdís Hanna Ægisdóttir, stjóri á deildini fyri burðardygd á lærda háskúlanum í Íslandi
  
• Páll á Reynatúgvu, løgtingslimur fyri Tjóðveldi
  
• Andrea Vang, lesandi og limur í Nordic Youth Biodiversity Network
  
• Leonard Sandin, granskingarleiðari á NIVA, Norwegian Institute for Water Research
  

Orðstýrari er Katrin Petersen, journalistur.

Umhvørvisvirðisløn Norðurlandaráðsins verður handað á hvørjum ári til ein norðurlendskan persón, eina fyritøku ella eitt felag, sum á fyrimyndarligan hátt hevur megnað at sameina virðing fyri umhvørvinum í sínum virki ella arbeiði, ella sum á annan hátt hevur tikið stór tøk fyri umhvørvið.

Evnið fyri virðislønina í ár varpar ljós á, at náttúra og náttúruumsiting eru ein stórur partur av loysnini á lívmargfeldis- og veðurlagskreppuni. Harumframt kunnu náttúrugrundaðar loysnir ráðleggjast soleiðis, at tær skapa sosialt, mentanarligt og fíggjarligt virði. Saman við virðislønini fær vinnarin 300.000 danskar krónur.