TROM: Upptøkurnar byrjaðar í dag

Í dag byrjaðu upptøkurnar til føroysku krimirøðina TROM, sum Torfinnur Jákupsson hevur skrivað við støði í krimibókum hjá Jógvan Isaksen.

Í høvuðsleiklutunum eru danski sjónleikarin Ulrich Thomsen og Olaf Johannessen.

Í dag verður tikið upp í Havn, og talan er bæði um uttandura og innandura upptøkur. Seinni í vikuni verður tikið upp aðrastaðni.

Eftir ætlan verða upptøkurnar lidnar um miðjan juni, sigur Jón Hammer, framleiðari, við Útvarpið.

Røðin verður í seks pørtum, sum skulu latast inn í desember, og síðani verða teir at síggja fyrst í komandi árinum á m.a. Viaplay.

Í sambandi við upptøkurnar legði løgreglan eina fráboðan út á Facebook við eini áheitan á fólk um at vísa tolsemi.

– Í samband við upptøkurnar kann væntast óreglusemi við ferðsluni, so tit verða vinarliga biðin um at vísa tolsemi.