Agnar Prestá
Á felags kirkjuráðsfundi 26. mai 2026 innstillaðu kirkjuráðini í Norðstreymoyar eystara prestagjaldi Tummas Lykke Kannuberg í embætið sum kirkjubókaførandi sóknarprest við sæti í Hvalvík.
Hetta skrivar Fólkakirkjan á heimasíðu sínari
- Nú er innstillingin staðfest, og landsstýrismaðurin í Mentamálaráðnum, Bárður á Lakjuni, hevur útnevnt Tummas sum sóknarprest í Norðstreymoyar eystara prestagjaldi, ið fevnir um Hósvík, Hvalvík, Streymnes, Saksun, Nesvík, Langasandur, Haldórsvík og Tjørnuvík.
Tummas Lykke Kannuberg er 33-ára gamal og upprunaliga úr Leirvík. Hann avloysir Jákup Erlingsson Petersen, sum nú er sóknarprestur í Suðuroynni.
Tummas varð prestvígdur í Viborg dómkirkju 9. oktobur í 2022, tá ið hann gjørdist sóknarprestur í Sparkær-Gammelstrup og Stoholm.
Fyrstu mánaðirnar í 2024 var Tummas Kannuberg virkandi sóknarprestur í Sjóvar prestagjaldi. Síðani juni 2024 hevur Tummas verið í tíðaravmarkaðum starvi sum virkandi hjálparprestur hjá prósti í Nes prestagjaldi. Afturat uppgávuni sum hjálparprestur hevði Tummas gudstænastur í kirkjusóknum, ið taldu færri enn 400 fólk.
Tummas byrjar í nýggja embætinum tann 1. august. Ætlandi verður innsetingargudstænasta í Hvalvíkar kirkju 16. august.
Vinarliga broyt tínar kennifíla - og privatlívsstillingar fyri at síggja hetta innihald