Tveir kláraðu ikki at lata bilin standa

Tveir bilførarar vóru í gjár tiknir fyri at koyra við rúsdrekka í blóðinum. Helst hava fleiri veitslur verið í gjárkvøldið, nú nýggjársaftan er í dag, og summi hava ikki klára at latið bilin standa.

Í tí eina førinum gjørdi løgreglan eitt átak og stegðaði fleiri bilum í miðstaðarøkinum. Ein vísti seg at koyra við rúsdrekka í blóðinum.

Hin bilførarin varð funnin heldur tilvildarliga. Løgreglan kom á ein bil sum koyrdi heldur undarligt, og tí varð valt at steðga honum. Illgrunin var rættur, tí alkohol var í blóðinum.

Báðir bilførararnir vórðu tiknir seint í gjárkvøldið.