Upprit um lesiátøk handað landsstýriskvinnuni

Málmenning hevur latið landsstýriskvinnuni í skúlamálum, Honnu Jensen, upprit um lesiátøk til børn.

Tær fýra, Turið Kjølbro, Marjun Ziskason, Lydia Didriksen og Sissal M. Rasmussen, sum tóku stig til kanningina av lesivanum hjá trimum árgangum í fólkaskúlanum í 2017/18,  handaðu fríggjadagin nýggju landsstýriskvinnuni Honnu Jensen, eitt upprit um, hvat kann verða gjørt og sett í verk, soleiðis at børn lesa meiri.

Hetta er framhald av lesivanakanningini, sum kom til ta niðurstøðu, at føroysk børn lósu alt ov lítið, skrivar Málmenning á heimasíðuni.

Heitið á tilmælinum er “Føroya lesa.”

Í uppritinum eru 12 uppskot um ítøkilig átøk. Teirra millum eru:

• Uppskot um, at bókaútgávan verður økt munandi so at “einhvør lesari fær møguleikar at finna “røttu” bókina.”
• Orka verður sett av til at talgilda tilfar til pallar, sum børn brúka í dag.
• Heiðra barnabókini
• Føroyar lesa 2020.