USA sendir 200 herfólk til Ísrael at fylgja vápnahvíldini í Gaza

Tilsamans 200 amerikonsk herfólk skulu til Ísrael at fylgja við vápnahvíldini millum Ísrael og Hamas. Fyrstu herfólkini komu til Ísrael í nátt, upplýsa ónevnd embætisfólk.

Amerikonsku herfólkini skulu halda eyga við, um vápnahvíldin verður hildin og hjálpa við at samskipa neyðhjálpararbeiði í Gaza. Tey verða tó ikki send inn í palestinska økið skrivar Ritzau.

Amerikonsku herfólkini koma til Ísrael úr USA og frá øðrum herstøðum í Miðeystri.

Tað var hósdagin, at Ísrael og Hamas samdust um eina avtalu um vápnahvíld í Gaza og leyslating av ísraelskum gíslum og palestinskum fangum. Vápnahvíldin fór í gildi fríggjadagin.

Avtalan tekur útgangsstøði úr einari friðarætlan í 20 stigum, sum USA hevur lagt fram. Sambært avtaluni skal Ísrael eisini stigvíst taka herdeildir sínar úr Gaza, sum eisini skal hava nýggja stjórn.