Veðrið ávirkar siglingina hjá Smyrli

Í gjár boðaði Strandferðslan frá, at tað orsakað av vánaligu veðurforsøgnini kundi roknast við broytingum og/ella avlýsingum á bæði oyggja- og bygdaleiðum. Higartil er tað bert á Suðuroyarleiðini, at túrar eru avlýstir.

Smyril hevur avlýst tveir túrar í morgun. Talan er um túrin av Krambatanga klokkan 8.30 og av Havnini klokkan 11.

Eftir ætlan verður tó siglt aftur í kvøld, og sambært Strandferðsluni verða tveir teir síðstu túrarnir fluttir ein tíma, so at siglt verður av Krambatanga klokkan 18.30 og av Havnini klokkan 21.