Verkfallið hjá SAS er av

SAS boðar í kvøld frá, at verkfallið hjá flogskiparunum er av.

- Vit hava eina avtalu, segði Rickard Gustafson, stjóri í SAS, á tíðindafundi í Stokkholm fyri løtu síðani.

Hann sigur, at nýggi sáttmálin skapar meira fleksibilitet í felagnum. Stjórin takkar eisini starvsfólkunum í SAS fyri at hjálpa ferðafólkunum meðan verkfalli hevur verið.

Nýggi sáttmálin hevur við sær lønarvøkstur á 3,5 prosent í 2019, 3 prosent í 2020 og 4 prosent í 2021.

Fleiri enn 4000 fráferðir vóru avlýstar undir verkfallinum, sum vardi í lítla viku, og fleiri enn 300.000 ferðafólk eru ávirkaði av hesum.

Rickard Gustafson upplýsti eisini, at tað gongur eitt samdøgur áðrenn øll flogferðslan koyrir sum hon skal.