Vil hava at vita, hvussu nógv fara av landinum

Á hvørjum ári verða føroysk børn og ung send til Danmarkar á stovn av føroyskum myndugleikum, tí mann ikki havur nøktandi tilboð til tey í Føroyum, og nú vil Liljan Weihe tingkvinna fyri Tjóðveldi hava at vita frá landsstýriskvinnuni í heilsumálum, hvussu nógv psykiatriin sendir av landinum.

– Heldur enn at lofta teimum og hjálpa teimum í teirra heimliga umhvørvi, verða tey send til eitt fremmant land við einum fremmandum máli og fremmandari mentan. Langt burturi frá familju, næstringum og øllum tí, sum er kent. Hetta kann sjálvsagt ikki góðtakast og má sjálvandi steðgast, sigur Liljan Weihe í viðmerking til fyrispurningin, sum kann lesast her.

Hon hevur spurt Margit Stórá, landsstýriskvinnu, hvussu nógvir borgarar undir ábyrgdarøkinum hjá landsstýriskvinnunu í psykiatriini eru send av landinum seinastu fimm árini, hvussu nógv eru farin sjálvboðið, og hvussu nógv hetta hevur kostað.

Eisini vil tingkvinnan hava at vita, hvussu mann kann tryggja, at neyðug viðgerð og hjálp frameftir kann veitast í Føroyum.