Zelenskyj: Eg vil hitta Putin

Ukraina er til reiðar at fara undir veruligar friðarsamráðingar, men ukrainski forsetin, Volodymyr Zelenskyj ynskir at hitta russiska forsetan, Vladimir Putin, tá ein friðarætlan er gjørd í samstarvi við USA og Evropa.

Tað sigur Zelenskyj, sum er á trygdarráðstevnu í München í hesum døgum.

– Eg vil ikki hitta tilvildarligar russar. Eg vil bert hitta ein: Putin. Og tað fer bert at henda, tá vit hava eina felags ætlan við Trump og Evropa. So seta vit okkum niður saman við Putin og fáa ein enda á krígnum. Bert tá eri eg til reiðar at møta upp, sigur ukrainski forsetin sambært Ritzau.

Zelenskyj sigur seg vera sannførdan um, at amerikanski forsetin, Donald Trump kann finna eina loysn í stríðnum millum Russland og Ukraina, um hann stuðlar ukrainum.

– Eg líti á hann. Fólk hava valt hann, og vit kunnu síggja, at hann er ein sterkur maður. Velur hann okkara síðu í staðin fyri at standa í miðjuni, fer hann veruliga at kunna leggja trýst á og fáa Putin at gera ein enda á krígnum.

Fyrsti fundur millum Zelenskyj og Vance
Í vikuni kom umsitingin hjá Trump annars við fleiri útsøgnum, sum eru lítið hugaligar fyri ukrainar.

Amerikanski verjumálaráðharrin, Pete Hegseth segði mikudagin, at Ukraina fyri at fáa eina friðaravtalu í lag noyðist at siga frá sær landaøki, sum Russland hevur hertikið, umframt at Ukraina má droppa ætlanina um at gerast partur av Nato. Limaskapur í verjusamgonguni var annars ein partur av friðarætlanini, sum Zelenskyj legði fram í september og skuldi forða nýggjum russiskum álopum.

Fríggjadagin hitti Zelenskyj fyri fyrstu ferð amerikanska varaforsetan, J.D. Vance fyri at umrøða støðuna í Ukraina. Efti fundin segði Vance m.a. soleiðis:

– Vit vilja hava ein enda á krígnum, og vit vilja hava, at drápini skulu steðga.

Amerikanski varaforsetin legði afturat, at USA ynskir ein varandi frið og ikki tað slagið av friði, sum elvir til stríð í Eysturevropa nøkur fá ár seinni.

Bæði Zelenskyj og Vance boða frá, at teir høvdu eitt gott prát, og sambært ukrainska forsetanum verður hetta ikki seinastu ferð, at teir hittast.

Zelenskyj og Vance á fundi í gjár (Mynd: EPA)