Alda Nielsdóttir
Forfólkini í grønlendska tinginum, Inatsisartut góðtaka ikki útsøgnirnar hjá amerikanska forsetanum, Donald Trump um at taka ræðið á Grønlandi, sum hann endurtók á fundi við Nato-aðalskrivaranum, Mark Rutte hósdagin.
Tað siga forfólkini í Demokraatit, Naleraq, Inuit Ataqatigiit, Siumut og Atassut í felags fráboðan.
– Sum floksforfólk halda vit ikki, at hesin atburðurin yvirfyri sameindum í eini verjusamgongu kann góðtakast.
Á tíðindafundi í sambandi við fundin við Mark Rutte, segði Trump, tá hann bleiv spurdur um Grønland, at hann væntaði, at USA fór at fáa ræðið á Grønlandi.
Eisini setti hann spurnartekin við um Danmark hevði rættindini til Grønland.
– Tey siga, tey hava rættindini til (Grønland). Eg veit ikki um tað er rætt. Tað haldi eg faktiskt ikki, segði hann sambært TV2.
Vinarliga broyt tínar kennifíla - og privatlívsstillingar fyri at síggja hetta innihald