- Í meira lagi at vinna tveir bilar

- Jógvan, hygg á skermin. Hatta eru tínir bilar sum standa har.

Soleiðis segði verturin í Gekkinum í kvøld, Petrina Berg, tá lutakastið um teir báðar bilarnar frá Wenzel hevði verið.

Jógvan Martin Hansen úr Hvannasundi var hepni vinnarin av teimum Ford-bilunum, sum fleiri høvdu glett seg til at vunnið. Føroya fólk hevur latið eitt fjall av gekkaseðlum inn, og kringvarpsstjórin, Ivan Niclasen, valdi ein burtur úr rúgvuni.

- Tað er í meira lagi, man koyrir ikki við meira enn einum, segði ein meira ella minni málleysur Jógvan Martin Hansen.

- Takk, túsund takk fyri tað. Dugi ikki at beskriva tað hvussu tað er, segði hepni vinnarin, sum nú fær úr at gera at royna bilarnar báðar.

Gekkurin fór annars ongan veg í kvøld. John Asbjørn Egilsson úr Kvívík kom ígjøgnum við fullari plátu, og var eisini nær við, men endaði við 15.000 skattafríum krónum.

Næsta fríggjakvøld er Gekkurin 2,1 milliónir.

Teir báðir nýggju bilarnir hjá hepna vinnaranum