26.940 løntakarar í september

Nýggjastu hagtølini hjá Hagstovu Føroya vísa, at í september vóru 26.940 løntakarar í Føroyum. Ein verður roknaður sum løntakari, um ein er millum 16 og 74 ár, fær A-inntøku og hevur bústað í Føroyum í tíðarskeiðinum, tá lønin er útgoldin.

Av teimum 26.940 løntakarunum vóru 13.969 mannfólk og 12.971 konufólk. Verður hugt eftir trendinum sæst, at munurin millum talið av mannfólki og konufólki millum løntakararnar ikki broytist nevnivert.

Av løntakarunum vórðu 9.579 teirra løntir í almennari o.a. tænastu, meðan 8.967 vórðu løntir í privatu tænastuvinnunum. 4.214 vórðu løntir í fiskivinnu o.a. ráevnisvinnu, og hetta var einasta vinnan, har talið av løntakarum ikki vaks við trendinum. Í byggivinnuni o.a. tilvirkan vóru 4.180 løntakarar.