822 milliónir útgoldnar í lønum í november

Lønarútgjaldingarnar hava bara voksið síðani mai 2013, og í november vóru útgoldnar 822 milliónir krónur. Hetta er áleið 222 mió. kr. meiri enn í mai 2013, vísa hagtøl hjá Hagsstovu Føroya.

Av teimum 822 mió. kr. eru 515 mió. kr. útgoldnar mannfólki, meðan konufólki hevur fingið útgoldið 307 mió. kr.

Innan høvuðsvinnugreinabólkarnar er tað enn innan almennar o.a. tænastur, at mest verður útgoldið í løn. Har vórðu útgoldnar 267 mió. kr. Næst eru privatu tænastuvinnurnar, har 250 mió. kr. vórðu útgoldnar. Í fiskivinnuni o.a. ráevnisvinnu eru lønarútgjaldingarnar minkaðar eitt sindur síðani mars í ár. Har vórðu útgoldnar 169 mió. kr. í byggivinnuni veksur støðugt, har 137 mió. kr. vórðu útgoldnar í november.

Tey trý økini, har mest varð útgoldið í løn vóru í Suðurstreymoyarøkinum við 329 mió. kr. í løn, Eysturoyarøkinum við 187 mió. kr., og Norðoyarøkinum við 99 mió. kr.