9 kajakkir í trupulleikum norður úr Ennibergi og bátur uppsteðgaður í Mykinesfirði

Stutt eftir klokkan 17 seinnapartin fekk MRCC boð frá einari kajakk, sum var komin í trupulleikar úr Ennibergi.

Talan var tilsamans um 9 kajakkrógvarar, sum vóru farnir frá Eiðisvík í dag, sum komu í ringan sjógv norður úr Ennibergi og rógvararnir skiltust frá hvørjum øðrum og komu at rógva í bólkum. Tann, sum boðaði frá, var saman við einum øðrum.

Stórt átak varð sett í gongd. Tyrlan, Tjaldrið, Einar Mikkelsen, fleiri bjargingarbátar og aðrir bátar vóru settir í gongd. Og mitt í rokanum komu boð um ein útróðrarbát, ið var uppsteðgaður í Mykinesfirði, boðar MRCC frá í tíðindaskrivi.

Ein annar útróðrarbátur var nærindis og royndi at sleipa, men líkindini vóru so vánalig, at endin slitnaði. Tískil tók hesin báturin báðar menninar av. Sverrri kom seinni á staðið, og tá var báturin rikin langt norður um Barðið. Men tað eydnaðist Sverra at seta fast á bátin og byrja sleipið.

Tyrlan var fyrst á staðið norðanfyri og kom fram á tríggjar kajakkir, sum róðu undir landi, men teir veitraðu tyrluna víðari, tí teir vóru ikki beinleiðis í vanda.

Nakað seinni kom tyrlan fram á tríggjar aðrar kajakkir, sum hildu seg tætt saman. Hesar tríggjar tók tyrlan so upp. Síðani kom tyrlan fram á tvær aðrar kajakkir, sum eisini hildu seg tætt at hvør aðrari. Hesar báðar tók tyrlan eisini upp.

Nú bleiv so ivamál um seinasta rógvaran. Men hann bleiv so funnin av tyrluni, og tikin upp av bátinum Búðadali úr Haraldssundi, sum eisini luttók í átakinum.

Teir seinastu tríggir, sum enn vóru í sínum kajakkum, róðu framvegis tætt undir landi, fylgdir av Fløtti, lítla bátinum hjá Norðoya Bjargingarfelag. Teir settu upp í Eiðsvík í øllum góðum.

Tjaldrið hevði sett sín MOB bát á sjógvin, fyri at vera skjótari á staðnum, og tann báturin tók so tær 5 tómu kajakkirnar upp.

Tyrlan setti teir 5 rógvararnar av í Klaksvík og løgregla og sjúkralið tóku ímóti teimum.