Arbeiðsloysið heldur fram at minka

Arbeiðsloysið í Føroyum bara minkar. Tað vísa nýggjastu hagtølini hjá Hagstovu Føroya. Hagstovan skrivar, at í septembur var árstíðarjavnaða fulltíðararbeiðsloysið 1,5%, samanborið við 1,6% mánaðin frammanundan og 2,5% fyri einum ári frammanundan.

Í tali var fulltíðararbeiðsloysið 414 persónar í septembur í ár, tað eru 298 færri enn sama mánað í fjør. Munurin millum kynini er minkaður nakað, har arbeiðsloysið hjá monnum nú er 1,3% og hjá kvinnum 1,7%.

Myndin omanfyri vísir gongdina í arbeiðsloysinum síðstu fjúrtan árini, eins og munin millum talið av skrásettum arbeiðsleysum persónum, persónar umroknaðir til fulltíð, og árstíðarjavnað tal av fulltíðararbeiðsleysum. Aftast í hesi grein er ein lýsing av hesum hugtøkum.

Í talvuni niðanfyri er arbeiðsloysið fyri alt landið, menn og kvinnur, lýst mánað fyri mánað, frá septembur 2017 til august 2018, bæði í tali av fulltíðararbeiðsleysum persónum og í % av arbeiðsfjøldini.

Munurin millum kynini er minkaður nakað
Tá arbeiðsloysið av álvara fór at minka eftir fíggjarkreppuna, minkaði tað nógv skjótari hjá monnum enn hjá kvinnum, men síðstu tvey-trý árini hevur munurin verið so at siga óbroyttur – tó so, at síðani ársskiftið er arbeiðsloysið hjá kvinnum minkað úr 2,8 niður í 1,7%, meðan tað er minkað hjá monnum úr 1,7 niður í 1,3%.