Atlantic Sapphire missur stóra mongd av laksi í óhappi

Alifelagið Atlantic Sapphire, sum alir laks á landi, hevur aftur haft eitt óhapp í framleiðsluni í Florida, sum hevur ført við sær, at uml. 500 tons av laksi eru deyðir. Greinarar meta, at tøkan hjá felagnum í 2021 minkar uml. 20 prosent, skrivar Vinnuhúsið.

Tað var í farnu viku, at felagið boðaði frá óhappinum, bert tríggjar mánaðar eftir, at stór mongd av laksi doyði í anlegginum hjá sama felagi í Danmark.

Sambært fyribils kanning hjá felagnum var orsøkin til nýggja óhappið ein design-veikleiki í resirkuleringsskipanini frá veitaranum. Veitarin, sum er Billund aquaculture, hevur tó viðmerkt, at veitarin ikki hevur verið partur av fyribils kanningini, og at tí fær felagið ikki viðmerkt fyribils niðurstøðuna.