Atlantshav ongantíð verið so heitt fyrr

Norðari parturin av Atlantshavi hevur í ár nátt sínum heitasta støð fleiri vikur fyrr á árinum, enn vanligt. Tað vísa nýggjastu hagtølini frá amerikanska National Oceanic and Atmospheric Administration, NOAA.

Vanliga plagar norðara Atlantshav at vera heitast í byrjanini av september. Men í hesi vikuni er hitin longu komin upp á tað støðið.

- Sambært okkara kanningum varð methægsti miðalhitin í norðrara Atlantshavi máldur mikudagin, tá hann var 24,9 stig celsius, sigur Zungang Yin, granskari hjá NOAA.

Higartil hægst máldi miðalhitin, sum er frá september í fjør, var 24,89 stig celsius, skrivar Ritzau.

NOAA, sum hevur skrásett hitan í havinum síðan byrjanini av 1980’unum, skal tó brúka einar tvær vikur fyri at staðfesta endaliga úrslitið av sínum mátingum.

- Støðan er óvanlig. Vit hava uppliva hitabylgjur til havs fyrr, men henda er áhaldandi og breiðir seg yvir eitt størt øki í Norðuratlantshavi, sigur Karina von Schuckmann, sum er havfrøðingur hjá felagsskapinum Marcator Ocean International.

Møguliga hitametið kemur eftir, at veðurtænastan hjá ES, Copernicus, og veðurfrøðiligi heimsstovnurin WMO hósdagin boðaðu frá, at juli í ár helst verður tann heitasti mánaðurin, sum nakrantíð er máldur á jørðini.

Stutt eftir hetta lýsti ST-aðalskrivarin, António Guterres, ógvusliga hitan á norðraru jarðarhálvuni sum eitt “ræðuligt summar”.

Tað er ikki einans í norðrara Atlantshavi, at metini verða tikin.

Mánadagin kom Miðjarðarhavið upp á 28,71 stig, sum er tað heitasta, sum er skrásett.

Tað upplýsti spanski stovnurin fyri havfrøði fyri AFP tíðindastovuni týsdagin. Tá var henda mátingin tó ikki váttað av Copernicus.